ভয়ংকৰ ভৱিষ্যতৰ বাবে সাঁজু হ’ব লাগিব উত্তৰ অসমৰ জনতা!

উত্তৰ অসমৰ বাবে মৃত্যুদূত স্বৰূপ NHPC ৰ বান্ধ এতিয়া কি স্থিতিত আছে কোনোবাই খবৰ ৰাখিছেনে? এসময়ত NHPC ৰ এই বান্ধৰ বিৰুদ্ধে প্ৰতিদিনেই সৰব আছিল অসমৰ দল সংগঠন। আন্দোলন কৰিছিল বৰ্তমানৰ শাসকীয় দল বিজেপিও। বান্ধ নিৰ্মাণৰ বাবে টাৰবাইন আহিলেই আন্দোলন কৰিছিল কৃষক মুক্তি সংগ্ৰাম সমিতিও। কিন্তু এতিয়া, NHPCৰ প্ৰতি হঠাৎ দৰদ কিয় সকলোৰে? কিয় সকলোৱে পাহৰিছে NHPCৰ বান্ধৰ কথা? দল-সংগঠনৰ এই নিৰ্লিপ্ততাৰ আঁৰৰ কাৰণ কি? এই প্ৰশ্ন NHPC ৰ বান্ধত সৰ্বশ্ৰান্ত হোৱা উত্তৰ অসমৰ মানু্হৰ। কাৰণ, যি কোনো মুহূৰ্তত অঘটন ঘটিব পাৰে NHPC ত ৷ কিন্তু কি দল, কি সংগঠন, এতিয়া এইবোৰৰ খবৰ ৰাখোতা কোনো নাই? মানুহৰ বিপদ হ’লেও এতিয়া খবৰ লওতা কোনো নাই। এসময়ত NHPC ৰ বিৰুদ্ধে প্ৰতিদিনেই প্ৰতিবাদ হৈছিল অসমত। কি গুৱাহাটী, কি লখিমপুৰ, সকলোতে হৈছিল NHPC নামনি সোঁৱনশিৰি জল বিদ্যৎ প্ৰকল্পৰ বিৰুদ্ধে তীব্ৰ প্ৰতিবাদ। টাৰবাইন আহিলেই হৈছিল আন্দোলন। প্ৰতিবাদকাৰীৰ বাবেই ঘুৰি গৈছিল টাৰবাইন কঢ়িওৱা বাহন। সেইসময়ত, NHPC ৰ বিৰুদ্ধে প্ৰতিদিনেই প্ৰতিবাদ কৰিছিল KMSS-এ। অখিল গগৈৰ নেতৃত্বত হৈছিল কৃষক মুক্তিৰ প্ৰতিবাদ। AASU, AJYCPয়ে NHPC-ক দিছিল হুংকাৰ। আনকি, সেই সময়ত বিৰোধীত থকা বিজেপিয়েও NHPCৰ বিৰুদ্ধে প্ৰতিবাদ কৰিছিল। কিন্তু ক্ষমতালৈ আহি লুটিবাগৰ মাৰিছিল বিজেপিয়ে। সমান্তৰালকৈ কিন্তু KMSS, AASU, AJYCP-ও NHPC ৰ বিৰুদ্ধে আচৰিত ধৰণে নীৰৱ। হঠাৎ- NHPCৰ প্ৰতি এই দৰদ কিয় দল-সংগঠনৰ? এই প্ৰশ্ন নামনি সোৱণশিৰি বান্ধে ভাবুকি অনা জনতাৰ। যদি সকলো নিমাতে থাকে, তেন্তে ভয়ংকৰ ভৱিষ্যতৰ বাবে সাঁজু হ’ব লাগিব উত্তৰ অসমৰ জনতা।