উপ-ৰাষ্ট্ৰপতিৰ পদত অধীস্থিত হ’ব নেকি অসম সন্তান!!

৯ চেপ্তেম্বৰত দেশৰ উপ-ৰাষ্ট্ৰপতিৰ নিৰ্বাচন। জগদ্বিপ ধনখৰৰ পদত্যাগৰ পিছতে উপ-ৰাষ্ট্ৰপতিৰ নিৰ্বাচনৰ বাবে সাজু হৈছে কেন্দ্ৰ। ইয়াৰ মাজতে, অসম তথা উত্তৰ-পূৰ্বাঞ্চলৰ উপযুক্ত ব্যক্তিক উপ-ৰাষ্ট্ৰপতিৰ পদত অধীস্থিত কৰাৰো দাবী উত্থাপন দল-সংগঠনৰ। এই দাবী সামাজিক মাধ্যমত প্ৰথমে উত্থাপন কৰিছিল অগপ নেতা মনি মাধৱ মহন্তই। ফখৰুদ্দিন আলি আহমেদৰ পিছত দেশৰ শীৰ্ষ সাংবিধানিক পদত অসমৰ কোনো ব্যক্তি অধীস্থিত হোৱা নাই। অসম তথা উত্তৰ-পূৰ্বাঞ্চলৰ বহু উপযুক্ত ব্যক্তি থকাৰ পাছতো এনে উচ্চ পদত স্থান নোপোৱাতো দুখৰ কথা বুলি উল্লেখ কৰিছে অসমৰ একাংশ দল- সংগঠনে। প্ৰশ্ন উঠিছে এয়া অসম তথা উত্তৰ-পূৰ্বাঞ্চলৰ প্ৰসিদ্ধ ব্যক্তিসকলৰ অনীহা নে ৰাষ্ট্ৰীয় বলয়ৰ অনীহা। শেহতীয়াকৈ পুনৰ দাবী উত্থাপন হৈছে যে, অসম-উত্তৰ পূৱৰ উপযুক্ত ব্যক্তিক উপ-ৰাষ্ট্ৰপতিৰ পদত অধীস্থিত কৰিব লাগে। দল, সংগঠন, ৰাজনৈতিক নেতাৰ উমৈহতিয়া দাবী এইবাৰ অসম, উত্তৰ-পূৱৰ লোক হওক উপ-ৰাষ্ট্ৰপতি। চৰ্চাত আছে কেইবাজনো ব্যক্তি। উচ্চতম ন্যায়ালয়ৰ প্ৰাক্তন মুখ্য ন্যায়াধীশ ৰঞ্জন গগৈৰ লগতে চৰ্চাত আছে কেইবাটাও নাম। তেওঁলোক হৈছে, ত্ৰিপুৰাৰ প্ৰাক্তন মুখ্যমন্ত্ৰী মানিক সৰকাৰ, নাগালেণ্ডৰ মুখ্যমন্ত্ৰী নিফিও ৰিঅ’, চত্তীছগড়ৰ ৰাজ্যপাল ৰমেন ডেকা, মনিপুৰৰ প্ৰাক্তন মুখ্যমন্ত্ৰী এন বিৰেণ সিং, অসমৰ প্ৰাক্তন সাংসদ বিজয়া চক্ৰবৰ্তী, অসমৰ প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত। কিন্তু, উপ-ৰাষ্ট্ৰপতিৰ পদত অসম তথা উত্তৰ-পূৰ্বাঞ্চলৰ ব্যক্তি অধীস্থিত হয় নে নহয়, সেয়া জানিবলৈ অপেক্ষা কৰিব ৯ চেপ্তেম্বৰলৈ।