‘BJP ৰ সভাপতি দিলীপ শইকীয়াৰ অহংকাৰ হৈছে!’
BTC ৰ নিৰ্বাচনৰ দিন যিমানেই চমু চাপিছে, সিমানেই দূৰত্ব বাঢ়িছে BJP, UPPL ৰ মাজত। বাকযুদ্ধ আৰম্ভ হৈছে দুই দলৰ নেতৃত্বৰ মাজত। আৰম্ভ হৈছে অভিযোগ প্ৰতিঅভিযোগৰ ৰাজনীতি। প্ৰথমে শীতল যুদ্ধ আৰম্ভ হৈছিল বিজেপিৰ বোকোচাত উঠি নাগপুৰলৈ যোৱা প্ৰমোদ বড়োৱে, এতিয়া বিজেপিৰ নেতৃত্বৰ অজ্ঞাতে অধিক কাষ চাপিছে নাগপুৰৰ।
ইয়াৰ পিছতে, বিজেপিৰ সভাপতি দিলীপ শইকীয়াই ওদালগুৰিৰ এক সভাত ঘোষণা কৰিছিল, ৪০ খন আসনতে বিজেপিয়ে একক ভাৱে নিৰ্বাচন খেলিব BTC ত। আনকি, ভাষনত দিলীপ শইকীয়াই টানিছিল, বডোফা উপেন্দ্ৰ নাথ ব্ৰহ্মৰ বিষয়ো। একাংশই উপেন্দ্ৰ নাথ ব্ৰহ্মৰ নাম ব্যৱহাৰ কৰি ৰাজনীতি কৰা বুলিও বিজেপিৰ সভাপতি দিলীপ শইকীয়াই আওঁপকীয়াকৈ UPPL ক লক্ষ্য কৰিয়ে মন্তব্য কৰিছিল।
দিলীপ শইকীয়াৰ এই মন্তব্যৰ পিছতে UPPL ৰ ভিতৰ চৰাত ক্ষোভ সৃষ্টি হৈছিল। কিন্তু এতিয়া সেই ক্ষোভৰ বহিৰ্প্ৰকাশ ঘটিছে। সংবাদমাধ্যমৰ আগত ক্ষোভ প্ৰকাশ কৰি সংঘাতৰ যেন বহিৰ্প্ৰকাশ কৰিছে UPPL ৰ উপ-মুখ্য কাৰ্যবাহী সদস্য গোবিন্দ বসুমতাৰীৰ। গোবিন্দ বসুমতাৰীৰ অভিযোগ
:’বিজেপিৰ সভাপতি দিলীপ শইকীয়াৰ অহংকাৰ হৈছে’। আওঁপকীয়াকৈ দিলীপ শইকীয়াক ‘দাম্ভিক’ বুলিও উল্লেখ কৰিছে গোবিন্দ বসুমতাৰীয়ে। বসুমতাৰীয়ে ইয়াকো কয় যে, ‘আমি কাৰো ৰঙা চকু ভয় নকৰো’। গোবিন্দ বসুমতাৰীয়ে এনেদৰেও মন্তব্য কৰে, ‘কাৰো আশ্ৰয়ত থাকি নিৰ্বাচন নেখেলে UPPL য়ে। কাকো খাতিৰো নকৰে UPPL এ।’
UPPL ৰ শীৰ্ষ নেতাৰ এনে মন্তব্যই নিশ্চয় জোকাৰণি তুলিব বিজেপিৰ ভিতৰ চৰাত।
