হাৰিয়ানা বিজেপিৰ সফলতাত অসমৰো আছে ভাগ!
হাৰিয়ানাত বিজেপিৰ হেট্ৰিক
ৰাহুল গান্ধীৰ জেলেপী ৰাজনীতিৰ সুৰুঙাই বিজেপিক যেন উপহাৰ দিলে হাৰিয়ানা!
হাৰিয়ানা বিজেপিৰ সফলতাৰ ভাগ অসম বিজেপিলৈয়ো! কাৰণ, হাৰিয়ানা বিজেপিৰ সাংগঠনিক সাধাৰণ সম্পাদক ফনীন্দ্ৰ নাথ শৰ্মা। ২০০৩ ৰ পৰা অসম বিজেপিৰে একাত্ম হৈ আছিল ফনীন্দ্ৰ নাথ শৰ্মা। RSS ৰ প্ৰচাৰক ফনীন্দ্ৰ নাথ শৰ্মা বিজেপিলৈ আহিছিল ২০০৩ চনত। প্ৰথমে সহকাৰী সাধাৰণ সম্পাদক ৰূপে দায়িত্ব লাভ কৰা ফনী শৰ্মাই, পৰবৰ্তীকালত দ্বায়িত্ব লাভ কৰিছিল অসম বিজেপিৰ সাংগঠনিক সাধাৰণ সম্পাদক ৰূপে। অসম বিজেপিক সাংগঠনিক ভাৱে সৱল কৰাত যথেষ্ট অৰিহণা আছে শৰ্মাৰ। সেই গৰাকী ফনী শৰ্মাক ২০২৩ ৰ ২৯ জুলাইত বিভিন্ন কাৰণত অসমৰ পৰা আতৰাই হাৰিয়ানা বিজেপিৰ সংগঠিনক সাধাৰণ সম্পাদকৰ দ্বায়িত্ব প্ৰদান কৰা হৈছিল। সেই সময়ত কথা ওলাইছিল, বিজেপিৰ অন্তকন্দল, বিশৃংখল পৰিস্থিতিৰ বাবেই ফনীন্দ্ৰ নাথ শৰ্মাক আতৰুৱা হৈছিল অসম বিজেপিৰ পৰা। কথাৰ গুৰি যিয়েই নহওঁক, অসমৰ দৰেই হাৰিয়ানাতো দায়িত্ব লৈ সংগঠন শক্তিশালী কৰিলে ফনী শৰ্মাই। যাৰ পৰিপ্ৰেক্ষিতত ৮ অক্টোবৰত ঘোষিত হাৰিয়ানা নিৰ্বাচনৰ ফলাফলৰ সফলতাৰ ভাগ আন সকলৰ লগতে এভাগ ফনী শৰ্মালৈয়ো আহে। যাক লৈ গৌৰৱান্বিত অসম বিজেপি।
পিছে এতিয়া কথা ওলাইছে, ফনীন্দ্ৰ নাথ শৰ্মা পুনৰ অসমলৈ উভতিব। হাৰিয়ানালৈ উভতাৰ মন অসমৰ সাংগঠনিক সাধাৰণ সম্পাদক ৰবীন্দ্ৰ ৰাজুৰো। তেনেক্ষেত্ৰত কেন্দ্ৰীয় নেতৃত্বৰ সিদ্ধান্তৰ ওপৰত সকলো নিৰ্ভৰ কৰিব।
