ৰহিমলাৰ চাহ কাপ….

আজি স্কুল বন্ধ বাবে ৰহিমলা ঘৰতে আছে। দুপৰীয়া গৰুকেইটাক পানী খোৱাই আহি বাৰাণ্ডাতে বহিলে। মাক আজি তাঁতত বহিছে। এনেই তায়ে বহে। গামোচা ১০ খন লগোৱা হৈছে, সকামে, নিকামে লাগে বুলি। সৰু সৰু ফুল তোলা হৈছে। তাইৰ চাহ একাপ খাবলৈ মন গৈছিল। মাকেও খাব নেকি ৰহিমলাই সুধিলে

: মা, চাহ খাবি নেকি? মোৰ খাবলৈ মন গৈছে। পুৱাৰ গাখীৰ অলপ আছিল নহয়!

চিগা সুতা জোৰাই মাকে মাতিলে,

: চেনি নাই, চাহপাতো অকণমানহে আছে

অহ! হয় নেকি, বুলিলে ৰহিমলাই। আচলতে যোৱা সপ্তাহত ককায়েকে বজাৰত পাণ বিক্ৰী কৰি আন সামগ্ৰীৰ লগতে, এপোৱা এপোৱা চেনী চাহপাতো আনিছিল। সেয়া যে শেষ হ’ল তাই পাহৰিছিল। এনেতে মাকে আকৌ মাতিলে,

: তুলিৰ তলতে ৫ টকা আছে। চেনী দুটকা, চাহপাত দুটকাৰ আনগৈ যা। এটকাটোৰ চানা খাৱনে কি লৈ আহিবি।

মাকৰ কথাত তাই একেকোবে গৈ তুলিখন উঠাই চালে। হয় ৫ টকা আছে। দুপৰীয়া সময়ত নীলৰ দোকান বন্ধ থাকে। দধীৰ দোকানলৈয়ে গ’ল তাই। দেও দি দি গৈ এপাকত চেনী চাহপাত আৰু ৫০ পইছাৰ ভজা বাদাম আনিলে তাই। ৫০ পইছা ঘুৰাই আনিলে।

চাহ বনাই তাই তাঁতৰ কাষলৈয়ে লৈ গ’ল। তাতেই খাব দুজনীয়ে। এনেতে ৰাষ্টাৰে গৈ থকা কাষৰে নিৰলা বৌৱে পুখুৰী পাৰেৰে চাই মাত লগালে

: অ’ ৰহি, গাখীৰ চাহ নেকি?

তাই উত্তৰ দিয়াৰ আগতেই মাকে মাতিলে,

: আহ বোৱাৰী, খাবি আহ একাপ গাখীৰ চাহ!

আৰু একাপ চাহ বনাবলৈ তাই পাকঘৰ পালেগৈ।