স্থবিৰ হৈছে নেকি যুৱ মৰ্চাৰ কাম কাজ!!

সন্মুখত BTC নিৰ্বাচন। তাৰ পিছত ‘২৬ ৰ বিধানসভা বিধানসভা নিৰ্বাচন। বিজেপি ইতিমধ্যে সাঁজু হৈছে নিৰ্বাচনলৈ। বিশেষকৈ যুৱ প্ৰজন্মক লক্ষ্য কৰি বিজেপি আগবাঢ়িছে ‘২৬ লৈ। যুৱক-যুৱতীৰ বাবে কেন্দ্ৰ-ৰাজ্যৰ বিজেপি চৰকাৰে গ্ৰহণ কৰিছে বহু আচনি। বিশেষকৈ মুখ্যমন্ত্ৰীৰ আত্মনিৰ্ভৰ আচনি, ফেলশ্বিপৰ আচনি সমূহে আকৰ্ষিত কৰিছে যুৱ প্ৰজন্মক। মুঠতে, যুৱ প্ৰজন্মক আকৰ্ষণ কৰিবলৈ বিজেপিয়ে লৈছে বিভিন্ন আচনি। চৰকাৰৰ যিমানেই তৎপৰতা বাঢ়িছে, সিমানেই যেন নিৰ্লিপ্ত হোৱা দেখা গৈছে বিজেপিৰ ভাতৃ সংগঠন যুৱ মৰ্চাক। যুৱ প্ৰজন্মক আকৰ্ষিত কৰিব পৰা কৈ কোনো পদক্ষেপ গ্ৰহণ কৰা দেখা পোৱা নাই BJYM ৰ তৰফৰ পৰা। এই লৈ ভিতৰি যেন ক্ষুন্ন ৰাজ্যিক নেতৃত্ব। কাৰণ এসময়ত ABVP ক সৱল নেতৃত্ব প্ৰদান কৰা ৰাকেশ দাসক লৈ অহা হৈছিল বিজেপিৰ যুৱ মৰ্চাৰ সভাপতি হিচাপে। ২০২৪ ৰ ২১ জুলাইত বিজেপিৰ যুৱ মৰ্চাৰ সভাপতি হিচাপে নিযুক্তি লাভ কৰিছিল RSS ৰ বিবিধ সংগঠন ABVP ক নেতৃত্ব দিয়া ৰাকেশ দাসে। সিদ্ধাংকু অংকুৰ বৰুৱাক আতৰাই যুৱ মৰ্চাক ১১ মাহে নেতৃত্ব দি আহিছে ৰাকেশ দাসে। যুৱ মৰ্চাৰ হৈ কাম কৰি থকা বহু নেতাক আতৰাই ৰাকেশ দাসক সভাপতিৰ দায়িত্ব দিয়া হৈছিল। প্ৰথম পৰ্যায়ত ৰাকেশ দাসৰ নেতৃত্ব কিছু কাৰ্যসূচী হাতত লোৱা হৈছিল যদিও বৰ্তমান যে স্থবিৰ হৈ পৰিছে বিজেপিৰ যুৱ মৰ্চা। এনেদৰেই থাকিলে কি হ’ব ২০২৬ ৰ নিৰ্বাচনত? যুৱ মৰ্চাই দলৰ প্ৰতি আকৰ্ষিত কৰোৱাব পাৰিবনে অসমৰ যুৱ প্ৰজন্মক? কাৰণ, ২০২৪ ৰ ভোটাৰ তালিকা অনুসৰি প্ৰায় ১,৩০,৮৮,৯২৭ যুৱ ভোটাৰ আছে অসমত। ইয়াৰে,
১৮ ৰ পৰা ১৯ বছৰৰ ভোটাৰৰ সংখ্যা প্ৰায় ৪,৩৫,৪০৩
২০ ৰ পৰা ২৯ বছৰৰ ভোটাৰৰ সংখ্যা প্ৰায় ৬৭,০৫,৪৩৬
৩০ ৰ পৰা ৩৯ বছৰৰ ভোটাৰৰ সংখ্যা প্ৰায় ৫৯,৪৭,৯৮৮

৪০ ৰ পৰা ৪৯ বছৰৰ ভোটাৰৰ সংখ্যা প্ৰায় ৪৭,৯৮,২৬২
এই সমূহ ভোটাৰক আকৰ্ষিত কৰিব পৰাকৈ যুৱ মৰ্চাই আগন্তুক ৬ মাহৰ ভিতৰত কোনো কাৰ্যসূচী গ্ৰহণ কৰিবলৈ সক্ষম হ’ব নে? কাৰণ বিজেপিত প্ৰতিটো মৰ্চাই নিজৰ নিজৰ স্থানত কাম কৰি দলৰ ভেটি শক্তিশালী কৰি ভোটাৰক আকৰ্ষিত কৰাৰ দ্বায়িত্ব লয়। তেনেস্থলত দলৰ আটাইতকৈ গুৰুত্বপূৰ্ণ মৰ্চাটোৰ স্থিতি কি হ’ব ‘২৬ ত! ৰাজ্যিকৰ নতুন সমিতি গঠনৰ লগে লগে হয়তো সলনিও হ’ব পাৰে যুৱ মৰ্চাৰ সভাপতি। অৱশ্যে সকলো নিৰ্ভৰ কৰিব নেতৃত্বৰ ওপৰত। কাৰণ এসময়ত ৰাকেশ দাসৰ নেতৃত্বতেই ABVP য়ে প্ৰান পাই উঠিছিল।